lunes, 10 de octubre de 2011

Del tiempu de seronda nel Parque Natural de Redes...

          Tiempu de seronda, del tardíu. N'ochobre xibla l'airón de les castañes y los llagares son arume de mazana mayao y frescor de sidra del duernu, dulce y denso. Presta pisar la viesca, sentir el ruxir de la xamasca qu'esborra los carreros, y plasmar col cuadru impresionista de la fueya de castañales, fayes, abedurios..., pincelaes rellumantes d'encarnáu encesu, verdes o amarielles. Pa Los Santos, la lluz amortez y el sol, más que calecer, caricia cuando ye a trespasar les ñubes de plombu qu'aportes les primeres ñeves. Entrando n'Avientu, la mar ye un coral de galerna qu'españa nos cantiles espluma turbio y crespo.


Otoño en Redes, fotografía de Félix González Muñiz.



          Nela xenética sentimental de los asturianos qu'algamaron a conocer la cultura campesina tradicional, inda alita esti tiempu de magüestos, esbilles y esfoyaces, de samartinos y filandones. N'aquelles reuniones sociales trabayábase n'andecha, al empar que se remembraben hestories y socedíos célebres, baillábase, cantábase y avezaben a terminar en xuegos picardiosos y folixa. Yeren l'antoxana de les que vendríen nes tardes abisies de la ivernada cuando, alrodiu'l llar, la casa yera l'abellugu de la pallabra vieya, el templu de la tresmisión oral de la tradición, del saber colectivu pasando de güelos a nietos. Güey son memoria d'otra dómina, magar que milagrosamente queden resclavos d'aquelles tradiciones al pie de reproducciones etnográfiques urbanes.  

No hay comentarios:

Publicar un comentario en la entrada