miércoles, 26 de octubre de 2011

Del'osu pardu (Ursus arctos) qu'anda per Redes...

          Van ya cinco díis, fue l’últimu sábadu, que Luisón Lobeto, el fíu de Vidal, atopó estes huelles d’osu pardu nel puente L’Ablanosa, de llau la carretera subiendo pal puertu, asina que cualquier díi preséntase per Tarna, per Pendones, per La Fó o per Bezanes. N’esti tiempu de seronda l’osu tien que fartucase abondo pa’podese encuevar pa’finales d’añu y aguantar ivernau hasta casi marzu o abril, d’ende que s’atope agora enrededor de los pueblos atracándose de miel de les colmenes, escarbando per los huertos y tamién per los conteneores.




En les dos asemeyes vese una huella muy perfecha de les manes, pates delanteres, de planta ancha y con los
cinco deos y les garres muy marcaos. Asemeyes de José Luis Lobeto Fernández (Bezanes, Casu).



La población de osu pardu ya cuenta con doscientos exemplares nel Cordal Cantábricu, según sacose de los estudios fechos pola Universidá d'Uviéu y el Centru Superior d'Investigaciones Científiques (CSIC), a petición del anterior Gobiernu asturianu. Estos trabayos recoyíen información de la situación demográfica del osu pardu, sobre'l so hábitat, y les sos característiques xenétiques. Amás, analizaben el comportamientu individual de los osos pardos cantábricos e identificaben corredores ente la población occidental y oriental.

Otra de les conclusiones más destacaes de los estudios ye l'aumentu del tránsitu d'exemplares ente la población occidental y oriental, y l'aparición d'híbridos al cruciase exemplares procedentes de les dos poblaciones. Ye de resaltar la importancia de los resultaos algamaos hasta agora, que son un llogru colectivu, frutu del trabayu fechu dende l'añu 1991, cuando s'aprobó'l primer Plan de Recuperación pal Osu Pardu n'Asturies.

Nun se sabe bien si queremos qu’el osu pardu ande per’ende, o qu’acabe onde los demonios, pero si tá protexíu ye porque los qu’entienden d’esti telar (nun falo d’ecoloxistes, falo de biólogos, ecólogos y ambientólogos, d'esos que nun sabéis muy bien lo que fecemos) tan d’acuerdu en que nun se pué acabar con él ni per caprichu ni per refalfiu. Yé agora que’mos acordamos del cazaorín de Caliao, José González, que llevó per delanti casi cien exemplares n'el sieglu XVIII (y del que falaremos n'otra entrá más alante), de Xuanón el de Cabañaquinta, qu’echó en baxu trentaiún más n’el sieglu XIX, o d’Angelón el de Cerreu, que pa'nun quedase curtiu n’el sieglu pasau metióis cartuchu a otros cincuentaiún.

Les asemeyes de Luis tan feches con un teléfonu móvil pero salieroni perfeches y operatives, namás que-i-faltó mediles pa saber si el osu era vieyu o xoven. Luis, gracies per fecénosles llegar y compartíles con la xente qu'asoma per esti blogue.

No hay comentarios:

Publicar un comentario en la entrada